Ætli verðið ráði ekki miklu?

Samkvæmt nýrri skýrslu um netgæði í OECD löndum sem nýsjálenska stofnunin InternetNZ hefur gert þá koma Íslendingar ekki vel út. Ég vil nota tækifærið og hrósa þeim sem sendu fréttina inn á mbl.is fyrir að hafa tengil með frekari upplýsingum með.´

Þetta gladdi mig mikið þar sem ég sendi bréf þess eðlis til þeirra, því oft hefur mig langað til þess að kynna mér málin betur ;)

En sem sagt kostnaðarþáttur okkar dregur úr netgæðum samkvæmt þeim staðli sem þeir nota til að meta stöðu landanna. ég sá það líka í skýrslunni að við mættum bæði ná því að lækka verðið en einnig að auka hraðann.

Gaman, gaman að láta sig dreyma um það 

Netþjónusta á Íslandi fær ekki háa einkunn

Hulduhrútslegur .... hvað er nú það?

Takk fyrir Össur að bæta íslenska orðaforðann minn. Ég var að lesa áhugaverða grein um samskipti Íslands, Bandaríkanna og NATO. Þar klingir Össur út með lýsingu á Jaap De Hoop Scheffer að hann hafi verið hulduhrútslegur. 

Ég stamaði aðeins á orðinu og fylltis af löngun til þess að vita hvernig maðurinn var. Var hann leyndur, hulinn, falinn hrútur. Hvað þýddi það þá þegar sagt væri að maðru væri hrútur? Ég fann ekkert um það að vera hrútslegur bara hrútleiðinlegur sem þýddi mjög leiðinlegur. Ég dró því þá ályktun að maðurinn væri mjög falinn, leyndur, leyndardómsfullur....

Þá datt mér það snjallræði í hug að fletta upp orðinu hulduhrútslegur og viti menn það er til í orðabókinni. Ég sem var búin að pæla þetta allt út. Hulduhrútslegur er sá maður sem lætur ekki hreinskilnislega upp álit sitt. Ég var nú ekki svo langt frá því hann virðist hafa verið að fela eitthvað.

Þá fór ég að velta fyrir mér afhverju þetta orð heyrist ekki alltaf um stjórnmálamenn á kosningatímum.

Ætli það sé vegna þess að Ísland er ekki lengur bændasamfélag? Þess vegna minna af hrútamáli í gangi en ég hef nú samt oft heyrt talað um hrútleiðinlegt fólk þó að hundleiðinlegir einstaklingar sæki nú stíft á. Enda hundahald ríkara en hrútahald í lífsstílnum okkar í dag! 

 

Framkvæmdastjóri NATO segir bandalagið muni bregðast við ef viðræður Íslands og Bandaríkjanna skila ekki niðurstöðu

Afhverju skiptir það ekki máli?

Hvað veldur því að fólki finnist ekki skipta máli hvort það notar atkvæði sitt í kosningum? Það er orðið ljóst að þátttaka var um það bil 4% lakari en í síðustu kosningum. Þetta er ekki bara að gerast á Íslandi. Áhugi fólks virðist fara minnkandi. Ég hef spurt nokkra sem orðið hafa á vegi mínum síðan á kosningadag og svörin sem ég fæ eru "það breytir engu hvort eð er" 

Ég er ekki sammála því en engu að síður þá er það skoðun þeirra sem þetta segja. Ég horði á fréttir og kastljós á ruv í gær. Þar voru vegfarendur teknir tali. Einn af mörgum sem ekki hafði trú á þeim meirihluta sem myndaður hafði verið í Reykjavík, maður sem kominn var til ára sinna og þar af leiðandi væntanlega með þokkalega reynslu af kosningum og því sem kemur í kjölfar þeirra sagði " þeir hegða sér alltaf öðru vísi þegar þeir eru komnir með valdið" 

Þetta leiddi huga minn að öðru. Hvers vegna er svona erfitt fyrir stjórnmálamenn að segja sannleikann. Í fréttum og kastljósi voru oddvitar listanna í Reykjavík spurðir í þaula eins og undanfarna daga. Mest áberandi var þó flest það sem tengdist Ólafi F-lista manni en  þar fór tvennum sögum af því hvað hafði gerst annars vegar á milli Ólafs og hinna 3ja flokkanna sem sátu á morgunfundinum þegar ólafur fór í matarhlé og hins vegar það sem farið hafði á milli Vilhjálms og Ólafs. Það er augljóst að einhver eða einhverjir eru ekki að segja sannleikann. Afhverju? Það skil ég ekki.

Er þetta ef til vill ein af ástæðunum að fólk missir áhugann á að nota atkvæði sitt. Það er ekkert að marka það sem menn og konur segja fyrir kosningar. Eitthvað sem ég heyri oft.

Er pólitík ef til vill lík Survivor þáttunum til þess að sá hæfasti vinni þá þarf að beita klókindum og einn þáttur þeirra er að segja ekki sannleikann. Slæmt þykir mér þó að vita til þess að menn og konur velji þann kostinn að segja ósatt.

En ég kemst auðvitað ekkert lengra með þetta en ég lifi nú alltaf í voninni um að pólitíkusar framtíðarinnar standi upp úr vegna heiðarleika, sannsögli og því að vera menn og konur orða sinna! 

 

Töluvert minni kosningaþátttaka nú en 2002

Gott framtak gegn heimilisofbeldi

Það gladdi mig að frétta af því að Jón Kristjánsson félagsmálaráðherra hafi undirritað samning um framkvæmd verkefnis "Karlar til ábyrgðar"

Karlar eru í áberandi meirihluta sem gerendur í heimilisofbeldi. Meðferðarúrræði fyrir þá er mikilvægt skref til framfarar. Heimilisofbeldið verður oft vítahringur sem erfitt er að rjúfa. Þó að þolendur styrki oft hegðun karlsins með því að gefa eftir og hlýða skipunum hans eða öðru því sem hann er að reyna að ná fram með hegðun sinni þá geta þolendur lítið annað gert. Eina leiðin til þess að vinna með þennan vanda er því í gegnum gerandann. Sálfræðingar munu veita gerendum sem sjálfviljugir leita sér hjálpar. Ég vona að sem flestir sem eiga við þennan vanda að stríða finni þörf hjá sér til þess aðleita sér hjálpar. Mér finnst ólíklegt að gerendur fyllist vellíðan eftir slíkan verknað. Ég trúi því að þeir hafi fest í vítahring styrkingarferlis. Þ.e.a.s. með því að beita valdi þá ná þeir sínu fram, hvort sem það er bara þögn til þess að horfa á sjónvarp eða eitthvað stærra.

Allt of stór hópur kvenna og jafnvel barna líka verða fórnarlömb heimilisofbeldis. Samkvæmt frétt á mbl.si er talið að á hverju ári verði um 1100 konur þolendur þess. Ég hlakka til að sjá þær tölur lækka og gleðst yfir þessu framtaki sem getur verið einn af mörgum þáttum til þess að skapa betra líf á Íslandi.

 

Skrifað undir samning um verkefnið „Karlar til ábyrgðar"

Á Adamsklæðum einum saman á efsta tindi heims

Hvað gekk manninum til?

Vildi hann komast nær Guði? Margir hafa trúað því að því hærra sem þeir fara, komast sem næst himninum og á stað þar sem fáir fara ( innan við 1400 manns hafa farið á tindinn síðan 1953) komist þeir nær Guði. Aðrir að ef þeir séu á Adams- eða Evuklæðunum einum saman, eru bara eins og Guð skapaði þau þá komist þau nær Guði. Maðurinn var á Adamsklæðum einum saman í 3 mínútur en talan 3 tengist hinni heilögu þrenningu. Var það þetta sem maðurinn var að gera eða....

Vildi hann setja heimsmet og komast í heimsmetabók Guinnes eins og talsmenn hans segja. Ef það er rétt var þá tilgangur mannsins á sama tíma að gera það og nálgast Guð sinn á sama tíma eða......

Vildi hann sína vanvirðingu og hneykslun. Hefði þá ekki verið nóg að bera á sér óæðri endann? 

Nota Búddistar orðið Guð? Ég minnist þess ekki þegar ég tók viðtal vegna rítgerðar sem ég var að skrifa um Zen búddista. Þeir trúa ekki á Guð. Hvað ætli það þá þýði þegar sagt er að búddistar líti á fjallið sem Guð?

Ég vildi svo gjarnan fræðast meira um þetta. Hegðun einstaklingsins er ráðgáta sem ég spái mikið í og þörf mín að skilja hvað fær fólk til þess að hegða sér eins og það gerir bæði jákvætt og neikvætt fer vaxandi, enda er það aðalviðfangsefni sálfræðinnar að auka skilning á hegðun mannsins.

 

Stóð berrassaður á hæsta tindi í heimi

Íslendingar að gera það gott í samvinnu við Jens Lien

Til hamingju Ingvar og Júlíus! Alltaf gaman að fá viðurkenningu fyrir vel unnin störf og Cannes er ekki af verri endanum eða þannig ;)

Ég hlakka til að berja myndina augum í haust, skondið efnisval. Ég hafði fregnir af því í dag að aðalpersónan væri í þyngdarlausu umhverfi og þyfti að vera í sérstökum stígvélum til þess að geta fótað sig. Er það ekki fyndið að þurfa þess í eigin lífi eftir dauðann.... hum

Norsk-íslensk mynd vann til verðlauna á Cannes

Frítt fyrir alla í strætó og afnema skatta á reiðhjólum

Margt smátt gerir eitt stórt og maður líttu þér nær! Hver og einn getur auðvitað lagt sitt af mörkum til þess að draga úr gróðurhúsaáhrifum. En betur má ef duga skal. Hvað ef eftirfarandi væri sett í forgang?

Frítt sé í strætó fyrir alla, og skilvirkara leiðakerfi?

Einkabílalaus dagur einu sinni í viku ( svona eins og sjónvarpslausi dagurinn um árið)? 

Uppbygging hjólreiðastíga?

Afnám tolla og annarra skatta á reiðhjól?

Ræktun trjáa?

Ef að frítt væri í strætó fyrir alla þá væri það talsverður sparnaður fyrir meðalfjölskyldu og margir velja þann kostinn sem tekur minnst úr peningaveskinu.  Það myndi minnka gróðurhúsaáhrif bæði vegna útblásturs en ekki síður vegna svifriksins þegarnagladekkin rífa upp malbikið. Við minnkun bílaumferðar myndu vagnarnir halda vel áætlun, minna hætta á umferðarslysum sem sagt sparnaður á ýmsum sviðum á sama tíma.

Nýr lífstíll, hjólreiðamenning dregur ekki bara úr gróðurhúsaáhrifum heldur eykur brennslu, dregur úr fitusöfnun á líkamanum, bætir heilsuna hressir og kætir. 

Mér finnst þetta með strætu afar spennandi hugmynd sem auðvitað kostar mikla peninga. Auðvitað þarf að taka þá frá einhverju öðru og hér erum við að tala um fastan rekstrarkostnað eins og laun og viðhald vagnanna. Spurningin er því hvernig þetta er framkvæmanlegt. Ég efast hins vegar ekki um að þetta er hægt.

Ég styð því Evrópusambandið af heilum með von um batnandi menn sem lifa best. 

ESB hvetur heimili til vinna gegn gróðurhúsaáhrifum

Hvað er við hæfi að segja?

Sjálfstæðisflokkur og Framsókn náðu að mynda meirihluta í borgarstjórn. Hvað er við hæfi að segja? Það er alltaf við hæfi að segja hug sinn. Framsóknarmenn með Björn Inga í fararbroddi sýna hugrekki og óska ég þeim velfarnaðar. Ég hlakka til þess að sjá hvernig Björn Ingi vinnur að þeim málum sem hann mun einbeita sér að. Hann geislar af lífi, ef til vill hefur nýji heilbrigði lífsstíllinn eitthvað með það að segja ;) sem er hið besta mál en mig grunar að það sé tlasverður töggur í honum ( annars hefði hann tæplega náð þeim árangri sem hann náði) Ég óska öllum þeim sem að meirihlutanum standa velgengni í samstarfinu.

Þetta er í fyrsta sinn sem tveir flokkar mynda meirihluta í borgarstórn en ekki í fyrsta sinn sem þessir tveir flokkar vinna tveir saman. Ég hef trú á því að þeir geti náð árangri í samstarfinu og hlakka til þess að sjá og lifa þær breytingar eða áhrif sem þeir munu skapa í Reykjavík.  

Vilhjálmur Þ. Vilhjálmsson verður borgarstjóri í Reykjavík

Lífið heldur áfram

Ég fyllist stollti og aðdáun þegar ég fæ fregnir af fólki sem horfir
til framtíðar, staðfast í trú sinni á batnandi líf. Ég vildi að ég gæti
óskað þeim til hamingju auglitis til auglitis, með tár í augum dáist ég
að þeim. Þetta eru sannkallaðir "survivours" eyðileggingin allt í
kringum þau, eldfjallið að gjósa og þau að einbeita sér að því að koma
heimili sínu í lag. Þó að athöfnin hafi verið látlaus þá er gleðin til
staðar mitt í allri eyðileggingunni. Já hvers er ekki maðurinn einmitt
megnugur!

Gengu í það heilaga á hamfarasvæði

Afhverju er ég ekki hissa?

Ef fólk les frambjóðendagreinarnar á síðu mbl.is þá skrifar Ólafur þar að flugvallarmálið sé stærsta málið. Ég á erfitt með að sjá að F listinn nái því máli fram. Það þýðir í raun að 4 flokka stjórn kemur heldur ekki til mála og því þarf Sjálfstæðisflokkurinn að leita til VG listans eða Framsóknar, Dagur var búinn að gefa þá yfirlýsingu að samstarf á milli D lista og S lista kæmi ekki til greina.

Ef til vill eru Framsóknarmenn ragir við að fara í samvinnu við Sjálfstæðismenn þar sem að þeir koma alltaf illa út í alþingiskostningum eftir slíkt samstarf. Enginn veit nú fyrir víst hvers vegna svo er, en Ólafur stjórnmálaspekingurinn sjálfur :) telur að gæti verið vegna þeirra sem eru á vinstrivæng Framsóknar. Kjósendur voru að kalla eftir breytingum það er nokkuð ljóst. Samstarf á milli VG og D er sannarlega breyting en líklegast finnst mér í stöðunni sem komin er upp að D og B munu á endanum renna í eitt. Þurrkast þá Framsóknarflokkurinn út í næstu kostningum eða? 

Ekkert varð úr frekari viðræðum D og F-lista

Brugðu sér í bústaðsferð með myndavélina

Þetta er nú bara eins og hjá Lalla Jones nema hann braust inn í hús og
lagðist með góða bók í rúm húsbóndans og sofnaði þar. Þessir brutust
inn í sumarbústað í Vaðnesi létu einnig fara vel um sig eins og Lalli
gerði um árið, en í heita pottinum ekki húsbóndarúminu, tóku myndir af
liðinu og skildur svo myndavélina eftir, eða þannig. 

Brutust inn í sumarbústað en skildu eftir myndavél

Fleiri vilja flugvöllinn burt

Það eru ekki bara Reykvíkingar sem eru að pæla í því hvort flugvöllurinn þeirra sé betur staðsettur einhvers staðar annars staðar en hann er. Borgirnar sem voru minni þegar staðsetning flugvallanna var ákveðin og samgöngur ekki eins góðar og þær eru í dag, hafa verið að þenjast út. Nú er svo komið að margra mati að staðsetningin sé skipulagsslys. Sjálfsagt er það rétt ef við skoðum staðsetninguna miðað við núverandi aðstæður. Ef til vill eru þó flugvellirnir þáttur í stækkun byggðar. Betri samgöngur svo dæmi sé nefnt. Aðstæður í dag kalla á breytingar bæði hér heima á Íslandi og líka við London. Auðvitað eiga flugvellir ekki að vera inn í byggð. Margt mælir gegn því t.d. aukin slysahætta og megnun, bæði vegna útblásturs og hávaða.

Vangaveltur mínar í lok kosninga og staðsetnignu flugvallarins hafa aukist. Að hafa hann áfram í Vatnsmýrinni virðist vera eitt af aðalmálum F listans. Það hlýtur að vera stóri hnúturinn í að mynda meirihlutastjórn þar sem F listamenn væru þátttakendur. En allt getur auðvitað gerst í pólitík eins og síðustu áratugir hafa sýnt. 

Vilja flytja Heathrow-flugvöll austur fyrir Lundúni

Áfram hæfileikaríkt fólk

Það gladdi mig að lesa að hlutur kvenna hefði heldur aukist í sveitastjórnarkosningunum eða um tæp 4%. Enn er það fréttnæmt og ekki sjálfgefið að hlutur karla og kvenna sé nokkuð jafn. Ég er sannarlega fylgjandi því að sem mest jafnræði ríki í stórnmálum sem annars staðar. Mikilvægast er þó  að áhugasamur einstaklingur fái tækifæri og að þeir sem hæfastir verða hvort sem þeir eru konur eða karlar komist áfram.

Áfram, áfram, þið hæfileikaríka fólk! 

 

Hlutur kvenna í sveitarstjórnun eykst

Pínlegt

Ég var að horfa á Kastljós þar sem stjórnendur beittu öllum brögðum til þess að ná fram einhverri játningu frá oddvitum flokkanna. Þetta líktist eiginlega yfirheyrslu en ekki náðist skýr játning um það hver væri nú besti kosturinn í stöðunni. Fyrst engar játningar náðust fram þá var farin sú leið að reyna útilokunaraðferðina. Dagur svaraði þá að viðræður samfylkingar og sjálfstæðisflokk væru ekki valkostur Ólafur gaf einnig í ljós að þrátt fyrir að hann hafi klofið sig frá sjálfstæðisflokknum á sínum tíma þá ættu flokkarnir tveir víða samleið. 

Það var ekki laust við að ég hálfvorkenndi þeim að sitja þarna fyrir svörum. Auðvitað verða menn að tala saman, öðruvísi er ekki hægt að mynda meirihluta. Það er líka verkefni spyrla í svona þáttum eins og Kastljósi að spyrja fólk spjörunum úr eða þannig. Ég bíð bara spennt eftir morgundeginum, því þrátt fyrir að lokatölur séu löngu komnar þá getur enn ýmislegt gerst. 

 

Vilja láta reyna á hvort D og F nái saman

Persónuleiki og starfsval

Það væri nú synd ef franska leikkonan Audrey Tautou myndi hætta að leika. Mér fannst hún reyndar ekki standa neitt sérstaklega upp úr í Davinci lyklinum en þið ættuð að sjá frönsku myndina Amelie. Hún er vægast sagt frábær í því hlutverki. Það hefur hentað persónuleika hennar vel.

Ég sá þessa mynd á franskri kvikmyndahátíð í Háskólabíó fyrir nokkrum árum síðan. Mér er hún enn mjög minnisstæð. Hef annars ekki séð margar franskar myndir en þær sem ég hef séð hafa ekki heillað mig. En Amelie var algjör perla. Þar lék Audrey unga konu sem valdi sér það hlutverk að hreyfa við fólki, sérstaklega þó einmana eða utangarðs. Ég veit ekki hvernig er að komast yfir þessa mynd en mér þætti virkilega ánægjulegt að sjá hana aftur. Ég vona svo sannarlega að Audrey finni leið til þess að höndla athyglina svo að kvikmyndaunnendur geti notið hennar sem listamanns. að sjáflsögðu er valið hennar og það er auðvitað ekkert líf að vinna við eitthvað sem veldur þér vanlíðan.   

Audrey Tautou efast um starfsvalið sitt

Tillaga um nýjan stíl

Já þau eru flott í tauinu á myndinni sem fylgir frétt úrslita í Reykjavík á mbl.is kosningar. Allir karlmennirnir með bindi og næs ;) Skyldi Björn Ingi hafa farið inn á lokasprettinum vegna nýja stílsins? Hver veit, en samkvæmt rannsóknum um hegðun fólks þá gæti það einmitt verið raunin.

Ég er því með tillögu til allra stjórmálamanna og kvenna. Endurskoðið heildarstílinn ykkar. Ef eitthvað annað en það sem þið eruð að nota í dag eykur ytri fegurð ykkar þá breytið til og komið innri fegurð ykkar þannig á framfæri. Það væri nú sorgleg staðreynd ef að efnilegur pólitíkus kemst ekki á framfæri vegna þess að fólk er einfaldlega ekki móttækilegt fyrir ytri ímyndinni sem er öllum alltaf sýnileg.

Að breyta um stíl er svona eins og að ganga í vinnubúningi. Velgengni pólitíkusar stendur og fellur með því að einhver taki eftir honum/henni og vilji í framhaldi velja viðkomandi. Ef marka má rannsóknir á hegðun fólks þá gæti hugsanlega þessi áhrifaþáttur spilað inn í. Að sjálfsögðu heldur góður pólitíkus stöðu sinni þegar hann/hún hefur sannað sig, en til þess að svo megi verða þá þarf viðkomandi að fá tækifæri til að sanna sig. Ég beini því tillögu minni til allra flokka og legg til að áhersla verði lögð á stíl  nýliðanna í  flokkunum.

Ég sem ber mikla virðingu fyrir atkvæðisrétti mínum mun fylgjast grant með útlitsbreytingum hinn aýmsu flokka í komandi alþingiskostningum. Já ég sagði alþingiskostningum, ekki ráð nema  í tíma sé tekið! 

Hvað er svona erfitt við að viðurkenna staðreyndir?

Það er ekki hægt að neita því að það var eilítið hjákátlegt að horfa og hlusta á viðmælendur hjá Silfur Agli ;) í kosningasjónvarpi NFS í gær. Hann var að pæla í ímynd frambjóðenda og hvernig fatastíll ofl hafði breyst síðustu dagana. Egill kómískur að vanda með nett bros sem varla sást og stjörnur í augunum þegar viðmælendur hans (aðstoðamenn 3ja frambjóðenda í Reykjavík) börðust á hæl og hnakka eða þannig við að draga úr því að um einhverjar eða verulegar útlitsbreytingar hafi verið að ræða. Þetta voru aðstoðarmenn Vilhjálms, Dags og Björns Inga

Hvað er svona slæmt við það að menn "sjæni" sig upp og tálgi aðeins líkamann? Það er vitað að fallegu fólki gengur betur að ná til annarra. Margar rannsóknir hafa verið gerðar af sálfræðingum um þetta efni. Fólk einfaldlega kemur öðruvísi fram við þann sem er fallegur. Spurningin er þá bara hvað er fegurð? En viti menn það var aðeins systir Björns Inga sem samþykkti að hann hefði breytt um lífstíl, farið í ræktina og lagt af! Hinir reyndu að eyða umræðunni og að ekkert hefði í raun breyst. Er ekki bara allt í lagi að viðurkenna það að menn eru að bæta sig? Ekki furða að Agli hafi verið skemmt. Þetta var verulega kómískt!!! Fólk virðist bara skammast sín fyrir að viðurkenna slíka bót hum!

Í dag er inn að vera stæltur, grannur og ganga um í merkjavöru. Flestir eru sammála um að bros fegri einstakling frekar en lýti. Við erum auðvitað að tala um ytri fegurð en hún er jú það sem fyrst blasir við hinum ókunna. Hinn ókunni kynnist oft ekki innri fegurð einstaklings vegna þess að tækifæri gefst ekki.Samkvæmt rannsóknum þá leggur fólk sig fram við að koma vel fram við þann sem er hefur ytri fegurð. 

Ég hef um langa hríð neitað að trúa því að þessu sé svona varið. En rannsóknirnar tala sínu máli. ég sé því ekki betur en að sá sem er heiðarlegur, staðfastur, stendur við orðin sín, skynsamur og hugrakkur þurfi einnig að vera: stæltur, grannur gangandi um brosandi með hvítar tennur og sólbrúnku í merkjavörunni sinni. Þá munu margir hlaupa til og vilja endilega kynnast viðkomandi, kjósa hann/hana og allir lifa happy ever after

Já ég þarf víst að endurskoða þetta viðhorf mitt að innri fegurð sé það sem máli skiptir. Hún skiptir auðvitað öllu máli en til þess að hún fái að njóta sín þá þarf hún hækjur ytri fegurðar svo að opnir armar mæti henni! 

Töff karakter

Angelía Jolie og Brad Pitt búin að eignast dóttur. Hlakka til að sjá MYNDINA af stúlkunni Væntanlega dýrasta mynd ever ;)

Þau eru bæði uppáhaldsleikarar hjá mér og spennandi karakterar svona eins og við Jón og Gunna fáum tækifæri til þess að kynnast stjörnum í gegnum fjölmiðla. Stúlkan gæti orðið töff karakter ef hún tekur eftir mömmu sinni  og ef hún tekur sko eftir pabba sínum þá gæti hún orðið töff karakter. Ja ég fæ þá ekki betur séð en að mamman og pabbinn séu töff karakterar og stúlkan er dóttir þeirra já þá er stúlkan töff karakter ......hum en spennandi

Angelina Jolie og Brad Pitt eignuðust dóttur

Hugleiðing um gildi lífsins í kjölfar atburða gærdagsins

Hvað er það sem skiptir máli í lífinu? Þegar litið er til atburða liðins dags, þeirrar sorgar og þjáningar sem margir eru að takast á við þá dragast fram hin raunverulegu gildi lífsins. Ein af grunnþörfum hvers einstaklings sem sameiginleg er öllum mannanna börnum er öryggi. Þegar öryggi brestur á taka ótti, kvíði, sorg ofl. erfiðar tilfinningar við. Þeir sem eru trúaðir leita þá í trú sína, aðrir gera það sem þeir geta í stöðunni og enn aðrir leiðast inn á braut vonleysis, tilgangsleysis eða hjálparleysis svo eitthvað sé nefnt. 

Mikilvægast er að eiga sér eitthvað, trúnna á Guð eða sína eigin getu, stuðning og hjálp samfélagsins og bærðra og systra, en trú á að alltaf sé einhver leið til sem gerir viðkomandi kleift að halda áfram þrátt fyrir áfallið.

Ég horfi á myndir af eyðileggingu hamfaranna í Yogyakarta og mér fallast hendur. Ég hugsa til allra annarra hamfara sem ég hef lesið um og til allrar hamingju þá heldur lífið alltaf áfram. Ég finn til með fólkinu og vildi vera til staðar, veita hjálpandi hönd þeim sem í neyð eru. En hér er ég óralangt í burtu og get eingöngu hugsað af kærleika og trú á getu þeirra sem þarna búa til þess að lifa af. Hugsað um þá sem hafa það í sér að rífa einn og annan upp úr þeim erfiðu og þungu tilfinningum sem geta verið lamandi fyrir lífið. Rífa þá upp, skapa samstöðu, halda áfram og gera það sem hægt er miðað við þær aðstæður sem eru til staðar.

Máttur mannsins getur verið gríðarlega mikill þegar á reynir og miklu meiri en hann sjálfan grunar.  En dagurinn í gær bjó yfir fleiri áföllum. Tveir menn létust á Akureyrinni og snerti það mig þegar sumir stjórnmálamenn sem voru í framboði í sveitarstjórnarkosningunum vottuðu aðstandendum samúð sína. Mikil sorg lá yfir Akureyri í gær.

Tvennt togaðist á í mér. Annars vegar sorgartíðindi vegna slysa og hamfara og hins vegar sveitastjórnarkosnignarnar. Ég var full af samúð vegna fyrri atburðanna og eftirvæntingu vegna þeirra síðari. Þegar ég fékk mér morgunkaffið mitt þá leiddi ég hugann að hinum pólitíska heimi. Rifjaði upp mínar minningar þegar ég var virkur þátttakandi þar. Ljós rann upp fyrr mér. Það snýst um að stjórna borginni, ráðstafa þeim peningum sem hún hefur á milli handanna. ég rifaði upp loforðalista liðinna kjörtímabila og minnist þess ekki að annað hafi verið áberandi en það sem tengist efnisheiminum. Sjálfsagt er erfitt að koma öður við. Ætli kirkjan eigi ekki að sjá um það. En það eru ekki allir trúaðir. Hvað með þá?

Hvernig má auka mátt mannsins þannig að grundvallaþörfum sé mætt og þegar á reynir þá geti maðurinn lifað af innri styrk sínum? Þessi morgunkaffibolli var pólitískari en nokkru sinni fyrr. Kollurinn á mér svona rétt aðbyrja að snúast. Maðurinn er félagsvera, hann ætti að geta notið þess að auka styrk sinn sem slík. Aldrei áður hef ég velt fyrir mér hvað býr á bak við hvert pólitískt loforð. Eitt af litlu dæmunum sem ég velti fyrir mér.....

Frítt í strætó fyrir aldraða, öryrkja, börn, unglinga og nema! Hvað býr á bak við þetta loforð. Er það það að þessir hópar hafa lítið á milli handanna og loforðið er því að það verður léttara að lifa? Eða er það að því fleiri sem velja að nota strætó því færri bílar á götunum, því auðveldara að halda áætlun, því færri umferðarslys, minni mengun af upptættu malbiki og útblæstri bíla? Eða liggur ef til vill ekkert sérstakt á bak við loforðið? Ef til vill bara beita?

Hefi ég haft aðgang að umfjöllun um það sem á bak við loforðin liggur þá myndi ég hafa varið tíma mínum í að lesa hana. Ef einhver sem þetta les veit um slíka umfjöllun frá þeim sem á bak við loforðin standa þá væri ég þakklát að fá ábendingu.

Já hver eru gildi lífsins og eiga þau gildi erindi inn í íslenska pólitík bæði sveitastjórna- og landspólitík?

 

Hafin er leit að fólki sem kann að vera á lífi eftir jarðskjálftann á Jövu

Hvað næst?

Ótrúlegt hvað fyrstu tölur í gær gáfu sterkt tóninn. Ég átti nú alveg eins von á einhverjum breytingum þegar utankjörstaðaatkvæði væru talin. Í morgun þegar ég leit inn á mbl.is sá ég að svo var ekki. En hvað næst. Það verður spennandi að sjá hvaða myndanir verða reyndar. Fáum við tveggja flokka borgarstjórn eða fjögurra flokka? Hvað tveggja flokka? Hvort verður Vilhjálmur eða Dagur næsti borgarstjóri? 

Kjörsókn var dræmari og man ég ekki eftir því áður að hafa komið á kjörstað og varla hræða á svæðinu. ég fór að kjósa inn í Laugardagshöll um 18:30 og vá hvað þar var tómlegt. Var ég örugglega á réttum stað? Ég var því ekki mjög undrandi að kjörsókn væru lakari en síðast.

Ég hlakka til að fylgjast með stjórnarmyndun. Þetta legst nú þannig í mig að nú verði umtalsverðar breytingar. Þykir mér afar ólíklegrt að  fjögurra flokka stjórn verði reyndin en auðvitað getur allt gerst.

Staðan í Reykjavík breyttist ekki þegar lokatölur birtust